संखुवासभा । संखुवासभाको चिचिला गाउँपालिका–३ घर भएका ३६ वर्षीय विकाश राईको हत्या भएको छ । हत्या गरेर फ्यालेको अवस्थामा चिचिला गाउँपालिका–३ स्थित भिरमा शव भेटिएको प्रहरीले जनाएको छ ।
सडेगलेको अवस्थामा शव फेला परेको र विभिन्न कोणबाट घटनाको अनुसन्धान सुरु गरिएको संखुवासभाका प्रहरी प्रमुख डीएसपी दक्षकुमार बस्नेतले बताए । उनका अनुसार भिरमा शव रहेको कुरा शनिबार साँझ प्राप्त भएको थियो । आइतबार बिहान भिडबाट निकालेर शवलाई पोस्टमार्टमका लागि जिल्ला अस्पताल खाँदबारी पठाइएको डीएसपी बस्नेतले बताए । ‘एकदमै अप्ठेरो भिरमा सडेगलेर दुर्गन्धित भएको अवस्थामा शव फेला परेको हो । घटनाका सम्बन्धमा थप अनुसन्धान अघि बढाइएको छ । अनुसन्धानपछि मात्रै वास्तविकता पत्ता लाछ,’ उनले भने ।
घटनाको प्रकृति हेर्दा हत्या नै गरेर भिरबाट शव फ्यालिदिएको प्रष्ट हुने प्रहरीको भनाइ छ । प्रहरी स्रोतका अनुसार उनको हत्या कात्तिक १८ गते भाइटीकाकै दिन भएको हो ।
विकाशको हत्यामा संलग्न भएको आरोपमा प्रहरीले चिचिला–३ का प्रदीप राईलाई पक्राउ गरेको छ । प्रदीप आफैंले प्रहरीलाई घटनाको जानकारी गराएका हुन् । ‘ढुंगाले हानेर हत्या गरेपछि शवलाई भिरबाट फ्यालिदिएँ भनेर प्रदीप आफैं सम्पर्कमा आएका थिए,’ एक प्रहरी भन्छन्, ‘खोजी गर्दै जाँदा प्रदीपले भनेकै भिरमा विकाशको शव फेला परेको हो ।’
डीएसपी बस्नेतले पनि घटनामा संलग्न भएको आरोपमा प्रदीपलाई पक्राउ गरेर सोधपुछ गर्ने काम भइरहेको बताए । ‘सोधपुछ गर्दैछौं । उसले (प्रदीप)ले भनेको कुरामा कत्तिको सत्यता छ भनेर जाँच हुँदैछ । घटनालाई तथ्य र प्रमाणले स्थापित गर्नुपर्ने हुन्छ,’ उनले भने ।
गाउँलेहरुले भने विकाशबाट असुरक्षित भयौं भनेर केही दिनअघि प्रहरीसमक्ष सुरक्षाको माग पनि गरेका थिए । त्यसपछि प्रहरीले पनि उनको खोजी गरिरहेको थियो ।
प्रहरीका अनुसार अपराधिक पृष्ठभूमिका विकाश जेलबाट २ महिनाअघि मात्रै छुटेका थिए । लागुऔषध ऐनअन्तर्गतको मुद्दामा उनी दोषी ठहर भएर सजाय भुक्तान गरी छुटेका हुन् ।
प्रहरीले उनलाई पछिल्लोपटक २०८० मंसिर १७ गते खाँदबारी नगरपालिका–७ बाट पक्राउ गरेको थियो । विकाशको घर खाँदबारी–७ मा पनि छ । चिचिला गाउँपालिकामा मंसिर १४ गते डेढ किलोग्राम गाँजा फ्यालेर उनी फरार भएका थिए ।
त्यसको ३ दिनपछि पक्राउ गरेर प्रहरीले लागुऔषध मुद्दा चलाएको थियो । त्योसहित उनी विभिन्न मुद्दामा १० पक्राउ परिसकेका थिए । प्रहरीका अनुसार विकाशले विभिन्न व्यक्तिहरुलाई आक्रमण एवं कुटपिट गर्ने, व्यक्तिगत सम्पत्ति तोडफोड गर्ने तथा लागुऔषध बिक्री गर्ने गरेका थिए ।
उनीविरुद्ध ६ पटक सार्वजनिक अपराध, २ पटक ज्यान मार्ने उद्योग र २ पटक लागुऔषध ऐनअन्तर्गतको मुद्दा चलेको थियो । सबैभन्दा पहिला आर्थिक वर्ष २०६५/०६६ मा सार्वजनिक अपराध ऐनअन्तर्गतको मुद्दा चलेको रेकर्ड प्रहरीसँग छ ।
त्यसपछि विकाशविरुद्ध आर्थिक वर्ष २०६७/०६८, २०६८/०६९, २०७२/०७३, २०७३/०७४ र २०७४/०७५ मा सार्वजनिक अपराध ऐनअन्तर्गत एवं अभद्र व्यवहार मुद्दा चलेको प्रहरीले जनाएको छ । आर्थिक वर्ष २०६७/०६८ र २०७५/०७६ मा ज्यान मार्ने उद्योगअन्तर्गत मुद्दा चलेको थियो ।
आर्थिक वर्ष २०७५/०७६ र २०८०/०८१ मा लागुऔषध ऐनअन्तर्गतको मुद्दा चलेको छ । विभिन्न मुद्दामा उनलाई अदालतले दोषी ठहर गर्दै कैद सजायको फैसला गरेको थियो । तर, सजाय भुक्तान गरेर छुटेलगत्तै उनी अपराधमा संलग्न भइहाल्थे ।
आर्थिक वर्ष २०६७/०६८ मा चलेको ज्यान मार्ने उद्योग मुद्दामा उनीविरुद्ध सबैभन्दा बढी ५ वर्ष कैद सजाय भएको थियो । त्यसपछि पनि विभिन्न समयमा अदालतबाट दोषी ठहर भएर सजाय भुक्तान गर्दै छुटेका व्यक्ति हुन्, विकाश ।
उनले मच्चाउने अपराधिक राजका कारण सर्वसाधारणले निक्कै असुरक्षित महसुस गर्ने गरको प्रहरीको भनाइ छ । ‘विकाशबाट असुरक्षित भयौं भनेर पटकपटक सर्वसाधारण आउने गरेका थिए । पक्राउ गरेर मुद्दा चलाए पनि छुटेपछि गएर पुनः अपराधमा संलग्न हुन्थे । विकाशले गरेको अपराधको फेहरिस्त निक्कै लामो छ,’ एक प्रहरी भन्छन् ।
