दुम्सीलाई हानेको बन्दुकको छर्रा लागेर एक महिला घाइते, घटनामा संलग्न पक्राउ

समाज

गृहपृष्ठ
समाज
दुम्सीलाई हानेको बन्दुकको छर्रा लागेर एक महिला घाइते, घटनामा संलग्न पक्राउ

दुम्सीलाई हानेको बन्दुकको छर्रा लागेर एक महिला घाइते, घटनामा संलग्न पक्राउ

सोमबार, असार २४, २०८१ अरूण सन्देश

संखुवासभाको चैनपुर नगरपालिका–११ केराबारीमा भरुवाबन्दुकको छर्रा लागेर एक महिला घाइते भएकी छन्। घाइते हुनेमा चैनपुर नगरपालिका–११ केराबारी बस्ने ४५ वर्षीया मेनुका खतिवडा रहेको जिल्ला प्रहरी कार्यालय संखुवासभाका प्रहरी नायव उपरीक्षक घनश्याम श्रेष्ठले जानकारी दिए।
प्रहरी नायव उपरीक्षक श्रेष्ठका अनुसार घरनजिकै रहेको मकैबारीको टहरामा सुतिरहेकी खतिवडा दुम्सीलाई हानेको बन्दुकको छर्रा लागेर सिकिस्त भएकी हुन्। प्रहरीले महिलामाथि बन्दुक प्रहार गर्ने दुईजनालाई आज पत्रकार सम्मेलन गरी सार्वजनिक गरेको छ। बारीको टहरामा मकै रुँगेर सुतिरहेकी खतिवडाको ढाडको दाहिनेपट्टी भरुवा बन्दुकको छर्रा लागेको छ। भरुवा बन्दुकको छर्रा लागेर उनको साथमा रहेको कुकुरसमेत घाइते भएको प्रहरीले जनाएको छ।
घाइते खतिवडाको जिल्ला अस्पतालमा उपचार हुन नसकेपछि थप उपचारका लागि काठमाडौँ लगिएको जिल्ला प्रहरी कार्यालयले जनाएको छ। खतिवडामाथि गोली प्रहार गर्ने दुईजनालाई प्रहरीले नियन्त्रणमा लिएको छ। विशेष सूचनाका आधारमा इलाका प्रहरी कार्यालय चैनपुरले चैनपुर–११ किङरिङका ३७ वर्षीय लंक तामाङ भन्ने अनिलकुमार तामाङ र सोही ठाउँका २६ वर्षीय तुलसी जिमीलाई लोड भएको दुईवटा भरुवा बन्दुकसहित नियन्त्रणमा लिएको प्रहरी नायव उपरीक्षक श्रेष्ठले बताए। उक्त घटना असार ४ गते भए पनि असार २१ गतेमात्र बाहिर आएको हो। घाइते महिलाको थप उपचारका लागि काडमाडौँ लगिएपछिमात्र घटना बाहिर आएको हो। राति जंगली जनावर ठानेर भरुवा बन्दुक पड्काउँदा खतिवडा घाइते भएकी हुन्। प्रहरीले उनीहरुको साथबाट असार २२ गते एक थान भरुवा बन्दुक र ४३२ ग्राम बारुदसमेत बरामद गरेको छ। पक्राउ परेका तामाङ र जिमीलाई जिल्ला अदालत संखुवासभाबाट म्याद थपेर मुलुकी अपराध संहिता, २०७४ बमोजिम ज्यान मार्ने उद्योग र हातहतियार खरखजाना कसुरमा थप अनुसन्धान भइरहेको प्रहरीले जनाएको छ।

प्रकाशित मिति: सोमबार, असार २४, २०८१ २१:१८

प्रतिक्रिया दिनुहोस्